Inihanda ng Brilliant Creations Publishing, Inc. ang aklat na Bukal ng Lahi 7: Serye sa Filipino (Edisyong K to 12) para sa mga mag-aaral ng ikapitong baytang. Ito ay karugtong ng serye ng aklat na Bukal ng Lahi, mula unang baytang hanggang ikaanim na baytang,na nakaayon sa mga aralin sa K to 12 Filipino Gabay Pangkurikulum na ipinalabas ng Departamento ng Edukasyon.
Layunin ng aklat na ito na malinang sa mga mag-aaral ang kakayahang komunikatibo, replektibo/mapanuring pag-iisip,at pagpapahalagang pampanitikan. Upang matamo ang layuning ito, sinikap na mapalawig ang mga kaalaman at pagsasanay sa aklat upang ang mga mag-aaral ay magkaroon ng mayamang karanasan sa paglinang ng kanilang kakayahan sa:
1. pagpapamalas ng pag-unawa sa mga akdang pampanitikan ng Mindanao, ng Kabisayaan, at ng Luzon;
2. pagsasagawa ng isang makatotohanang proyektong panturismo;
3. pagsulat ng sariling awiting-bayan, gamit ang wika ng kabataan;
4. pagsasagawa ng komprehensibong pagbabalita (news casting) tungkol sa kanilang sariling lugar;
5. pagpapamalas ng pag-unawa sa lbong Adarna bilang isang obra maestra sa Panitikang Pilipino; at
6. pagsasagawa ng malikhaing pagtatanghal ng ilang saknong ng korido na naglalarawan ng mga pagpapahalagang Pilipino.

Ginawang magkalapat ang pagtalakay ng mga araling pampanitikan at pangwika upang maging lalong makahulugan at makabuluhan ang paglinang ng kahusayan sa komunikasyon. May mga gawaing papangkat na naglalayong higit pang makahikayat ng aktibong pakikiisa sa talakayan.
Sa pagtatapos ng bawat yunit, naglakip ng mga pagsasanay na humahamon sa mga mag-aaral upang higit na maging malikhain, matatas, at epektibo sa paggamit ng Filipino sa pakikipagtalastasan.
Nawa'y makatulong ang aklat na ito sa paglinang ng inaasahang mga pamantayan parasa mga mag-aaral, at sa paglinang ng higit pang pagpapahalaga sa sariling kultura, sa pamamagitan ng iba't ibang mga panitikang pambansa.

Includes bibliographical references and glossaries.